Innleiing
Dersom vi har fatta eit såkalla enkeltvedtak, kan avgjerda klagast inn til overordna forvaltningsorgan (klageinstansen). Samferdselsdepartementet (SD) er klageinstans for avgjerdene våre.
Viktige reglar om klage over enkeltvedtak finn du i forvaltningsloven §§ 28 til 34.
Kven kan klage og kva kan ein klage på?
Det er berre parten eller han med rettsleg klageinteresse som har rett til å klage på enkeltvedtaket. Klagaren kan få hjelp av ein fullmektig, som vanlegvis må leggje fram ei skriftleg fullmakt.
Enkeltvedtaket er sjølve avgjerda av saka, til dømes «[s]øknaden om driftsløyve blir innvilga» eller «[a]vslag på søknad om tryggleikssertifikat». Avgjerda skil seg frå grunngjevinga, som forklarer kvifor avgjerda blei teken. Omgrepet enkeltvedtak er definert i forvaltningsloven § 2 første ledd bokstav a og b.
Kor skal de sende klagen?
Vi ber dykk sende klagen til oss, slik at vi kan førebu klagesaka for SD. De kan sende klagen på post@sjt.no eller til postadressa vår:
Statens jernbanetilsyn
Postboks 7113 St. Olavs plass
0130 Oslo
Hugs å oppgi saksnummer når de kontaktar oss.
Om SJT ikkje endrar vedtaket vårt som følgje av klagen, sender vi klagesaka til SD.
Klagefrist
Fristen for å klage er tre veker frå den dagen vedtaket vårt kom fram til parten.
Merk at eit pålegg om å gi opplysningar ikkje blir rekna som eit enkeltvedtak, og har ein klagefrist på tre dagar. Dette er nærare regulert i forvaltningsloven § 14.
Kva klagen må og bør innehalde
I klagen må de vise
- kva for eit vedtak de klagar på
- om nødvendig gi opplysningar som er viktige for klageretten og klagefristen
- kva endring de ønskjer i enkeltvedtaket
De bør forklare kva faktiske eller rettslege forhold som gjer at de meiner avgjerda vår er feil.
Klagen må vere underskriven eller autentisert av klagaren eller klagaren sin fullmektig.
Utsetje gjennomføringa av vedtaket
Sjølv om det er rett til å klage på eit vedtak, kan vedtaket vanlegvis gjennomførast straks. Det er likevel mogleg å søkje om å få utsett gjennomføringa av vedtaket, til klagefristen har gått ut eller til klagen er avgjord. Utsett frist er regulert i forvaltningsloven § 42.
Kostnadene dykkar med å få endra vedtaket vårt
Når eit vedtak blir endra til fordel for dykk, skal de få dekt nødvendige kostnader knytt til å få vedtaket endra. Dette gjeld ikkje dersom endringa skuldast dykkar eigne handlingar, forhald utanfor dykkar eller forvaltninga sin kontroll, eller andre spesielle grunnar som talar mot det.